Israel-Hamas war : US official-ten Gaza-a inremna siam turin nawr: Hamas firfiak chenna inah USD mtd 1 hu hmu chhuak

Israel tlawha zin, US Defence Secretary Lloyd J Austin leh Joint Chiefs of Staff chairman General Charles Brown chuan Thawhṭanni khan Tel Aviv-ah Israel prime minister Benjamin Netanyahu an kawm a, Gaza-a beihpui an thlak mekna tinep tur leh, inremna siam dan ngaihtuah turin an nawr.

Meeting-ah hian Israel Defence minister Yoav Gallant leh Chief of the General Staff Lieutenant General Herzi Halevi-te pawh an tel.

Lloyd Austin chuan Israel ram hruaitute chu Gaza-a beihpui an thlak lehna tura mipui tawrhna tinep thei tur anga bera ruahmanna siam turin a nawr a, hemi rual hian Hamas nena an inbeih meknaah Israel an thlawpna chu a la ngai reng tih a sawi zui bawk. Austin hian Defence Secretary a nih aṭanga Israel a tlawh ṭum lina leh, October 7-a Hamas firfiakten an beih hnuah Israel a tlawh ṭum hnihna a ni.

Thawhṭanni vek khan US's Central Intelligence Agency (CIA) William Burns chuan Warsaw, Poland-ah Israel intelligence unit, Mossad hotu David Barnea leh Qatar prime minister Sheikh Mohammed bin Abdulrahman bin Jassim Al Thani te a kawm. An thu rel hi tarlan ni lo mah se, Hamas leh Israel-in an mi mante inthleng tawn tura ni sarih chhung indo chawlhsana inremna an siam hnua meeting an nei lehna hmasa ber a ni a, tang inthleng chungchang hi an sawiho ngei rin a ni. Hamas hian Israel an beih ṭuma an mi man zinga mi 100 chuang an la hreng mek a ni.

Hamas firfiak inah USD mtd 1 chuang hu hmu

Israel Defence Forces (IDF) chuan Gaza Strip-a Hamas firfiak hruaitu senior pakhat chenna in an dapnaah, pawisa fai USD mtd 1 chuang hu hmuh a nih thu an sawi.

Hemi chungchang hi IDF chuan X-ah post-in, an pawisa man hi Israel l shekel bakah, US dollar leh Jordan leh Iraq pawisate a nih thu an sawi. Heng pawisate hi suitcase pahnih chhungah dah niin, an manna hi Gaza hmar lam, Jabaliya area hmun a ni.

Tun ṭum indona a thlen hma pawhin, Gaza Strip-a mipuite hian an dinhmun a chhiain an rethei hlawm hle a, hetih lai hian Gaza Strip-a roreltu, Hamas hruaitute erawh an khawsa nuam hle thung. In lian pui pui leh luxury hotel-ahte an khawsa hlawm a ni. US-a Israel embassy chuan Hamas hruaitu hlun ber ber pathum - Mousa Abu Marzouk, Khaled Mashal leh Ismail Haniyeh-te hausakna chu USD tld 3 chuang ṭheuh a nih thu a sawi. Hamas-te sum che vel hi kum khatah USD tld 1 a thling a, ISIS dawtah khawvela firfiak pawl hausa ber an ni tih a tarlang.