China rama lirnghingah mi 100 chuang an thi

China ram hmar thlang lam, Gansu province-ah Thawhṭanni zan zanlai vel khan magnitude 6.2-a nain lir a nghing a, kum 13 chhunga lirnghingin chhiatna a thlen nasat ber niin, chhiatna thlengah hian mi 118 an thi a, hliam 500 chuang an awm.

Thuneitute chuan thi zat hi an la pun chhoh a rinawm tih an sawi. China president Xi Jinping chuan chhanchhuah hna thawktute chuan lirnghing tuarte ṭanpui tura thawk chhuak turin a hriattir nghal a ni.

Local offcial-te chuan Gansu province-ah lirnghing hian building 5,000 vel a sawi chhiat thu an sawi. Gansu bial hi China-ah pawh bial rethei lai an nih avangin, inte pawh hi a ṭha tawk lo a, hei vang hian chhiatna pawh hi a thlen nasat zual phah niin an sawi.

Gansu hi Tibetan leh Loess plateau inkara awmin, Mongolia ramri bul a ni. Lirnghing ṭanna hi Chinese Muslim-te tamna, Linzia Hui Autonomous Prefecture a ni. Magnitude 6.2-a naa a nghin hnuah hian aftershock vawi 1- chuang a thleng leh bawk.

Thawhṭannia zana Gansu-a lirnghing hi kum 2010 hnua China rama lirnghing vanga thi an tamna ber niin, kum 2010-a Yushu, Qinghai province-a lirnghing vang khan mi 2,700 in nunna an chan a ni.