Singapore-ah Covid hri kai an pung Face mask vuah ṭha turin ngenna siam

Singapore-ah Covid-19 hri kai an pung leh nasa hle a, hei vang hian Heath Ministry chuan hri darh zel tur venna turin hma a la ṭan leh nghal. Zin veivah kawngah fimkhur tura mipuite chahin, hri laka invenna tura face mask vuah ṭha turin a hriattir.

December 3 - 19 inkar chungin Covid-19 kai thar hi mi 56,043 an awm a, hemi hma kar hian cse 32,035 report a awm bawk. Covid-19 hri kai vanga nitina damdawi-in pantu hi chawhrualin kar hmasa lama mi 225 aṭangin 350-ah an pung bawk a, intensive care unit (ICU)-a dah ngai hi ni khatah mi pakua ang zel an awm.

Singapore sorkar chuan an rama hri kai pun thar lehna chhan chu Covid-19 sublineage, BA.2.86, JN.1 tia an sawi vang chu niin a tarlang. Mahse hetih lai hian health lam thuneitute chuan JN.1 hi Covid variant dang aiin inkaichhawn a awl bik tih finfiahna a la awm lo niin an sawi thung.

Ministry of Health (MOH) chuan mipuite chu pawn chhuahnaah face mask hmang ṭha turin a ngen a, a bikin mipui punkhawm tamna hmunahte ngai pawimawh turin a chah. Thawk lama harsatna neite chu pawn chhuak tam lo turin an ngen. In lamah mahni inenkawl uluk tura chahin, damdawi-inte chu na zual tak takte enkawlna tura kian turin an chah bawk. Crawfurd Hospital-a Covid-19 treatment facility an siam chu a khah tawh avangin, tunkar hian Singapore EXPO Hall 10-ah treatment facility dang hawn belh leh an tum.