Colorado state-a Presidential primary ballot-ah Donald Trump disquality

US-a Colorado Supreme Court chuan nakkuma US President thlanna neih turah atana primary ballot neihah Donald Trump-a chuh ve a khap.

Court hian US Constitution-a insurrection clause hnuaiah, President hlui Trump hi kum thum liam taa US Capitol-a amah thawptuten buaina nasa tak an siama inhnamhnawiha puhin, nakkum March 5-a Republican voter-ten an state-a party presidential candidate thlanna an neih turah a tel a remti lo tih a puang. Hei hi US Constitution 14th Amendment-a Section 3 hnuaiah presidential candidate disqualifty a nih ṭum khatna a ni.

Court thutlukna hian Colorado state chauh a huam a, state dang - New Hampshire, Minnesota leh Michigan-a Trump disqualify an tumna erawh a hlawhchham thung. Colorado Supreme Court justice-te hi Democratic governor-te ruat vek an ni. Mahse an rorel hi nakkum January 4 thleng emaw, US Supreme Court thutlukna siam hma emaw chu hman theih a ni rih dawn lo. Official-te chuan presidential primary ballot princt chhuah hun, nakkum January 5 hma ngeia tihfel a ngai tih an sawi.

Hetih lai hian Donald Trump attorney-te chuan Colorado court thutlukna hi an ram court sang berah khin let an tum tih an sawi. Trump-a campaign thupuangtu, Steven Cheung chuan, "Colorado Supreme Court hian thutlukna felhlel tak a siam a, US Supreme Court-ah kan appel ngei dawn a ni," a ti. Republican national committee chairwoman Ronna McDaniel pawhin court thutlukna siam chu inthlan neih tura inrawlhna a ni tiin, RNC legal team chuan Trump hian inthlan hi a chuh ngei theihna turin a beihpui zel dawn tih a sawi bawk.

Kum 2020 US President thlanah khan Trump hi Colorado state-ah 13% points in a chak zo lo a ni. Nakkuma President thlanna neih turah pawh he state-a tling lo chung hian a chak thei dawn tho a ni. Mahse Colorado court-te tih dan ang hian, state dangin an disqualify chhoh ve a hlauhthawnawm hle thung.