Putin-a'n Ukraine nena inbiak an inpeih thu a sawi

Russia president Vladimir Putin chuan Ukraine chungchangah Ukraine ram bakah, US leh Europe nena inbiak an inpeih thu a sawi. Hemi rual hian Russia chuan an ram himna chu a ngaih pawimawh ber leh a ven tlat tur thu a sawi bawk.

Kum 2022-a Ukraine an run hnuah, Putin hian inremna a awm theihna atana inbiakna neih an inpeih thu a lo sawilang fo tawh a, mahse khawthlang ramte chuan a thusawi hi a ti tak tak lo niin an ngai.

Moscow-a defence ministry hotute nena meeting an neihah, Putin chuan Ukraine, Europe leh US-te chuan inbiakna neih an duh a nih chuan an inpeih thu hi a sawi. Mahse inbiakna an neih pawhin an ram ṭhatna tura an duh angin an kalpui dawn tih a sawi zui. He meeting-ah hian defence minister Sergei Shogu leh chief of general staff General Valery Gersimov, Federal Security Service (FSB) director Alexander Bortnikov-te an tel.

Kum 1991-a Soviet Union a kehdarh hnuah, Ukraine ram nia pawm aṭanga 17.5% hi Russia hian a thunun mek a ni. Kum 2014 khan Crimea bial luahin, nikuma Ukraine a run hnuah region dang pali lak belh lehin, heng hmunte hi Russia sipaite chuan an awp a ni. Hetih lai hian Ukraine chuan a ram aṭanga Russia sipaite um chhuah vek an nih hma chuan a chawl dawn lo tih a sawi.

Putin chuan defence ministry pawh thuam chak zel a nih thu sawiin, an ram dotute do let thei turin nuclear force pawh tihchangtlung a ni tih a sawi. Kum 2022, February thla aṭang khan Russia-in tank a siam hi a let 5.6 in a tipung a, unmanned aerial vehicle chu a let 16.8 leh artillery shell chu a let 17.5 in a pung bawk tih Shoigu chuan a sawi a ni. Kumin atan contract leh voluntary sipai 4,90,000 lak belh niin nakkumah chuan contracted force hi 7,45,000-ah tihpun a tum bawk.