US-ah Covid-19 vanga thi Mi nuai 1 chuang tawh
US-ah Covid-19 hri kai an hmuh chhuah hmasak ber aṭanga thla li hnu, nimin khan he hri vanga thi hi mi 1,02,107 an tling tawh a ni.
US hi Covid-19 vanga thi tamna ber ram a ni mek a, he hri kai hi mi 17,45,803 an awm tawh a, khawvel a hri kai zawng zawng aṭanga 30% a tling a ni. Heng hri kai zinga enkawl dam tawh hi mi 4,90,130 an tling tawh bawk.
January 21 khan US-ah Covid-19 kai an awm ṭan a, February thla khan he hri vanga thi hi an awm chho ṭan bawk. US-ah hri hi a darh zel loh nan, president Donald Trump chuan March 13 khan national emergency a puang a ni. Mahse heti chung hian March thla tawp lam khan US-a state 50-ah he hri hi a darh chhuak ta tho a ni.
Kar hmasa lam khan US-a state 20-ah Covid-19 kai an la pun belh nasa hle a, metropolitan area zinga Chicago, Los Angeles leh Washington DC-ah te chuan he hri hi a la darh mek zel a ni. US-a hri kai hluarna New York-ah chuan he hri vanga thihna thleng chu a ziaawm chho thung a ni.
US-a hri kai an pun chakna chhan hi mi ṭhenkhat chuan President Trump-a'n hma a lak ṭhat tawk loh vang leh state governor-te hma lak ṭha tawk loh vangah an puh. Mahse Trump chuan US-a hri kai an tam chhanah hian test an neih tam vang a nih thu a sawi thung. Hri leng vanga inkhuahkhirhna kalpui avangin hian sumdawnna leh hnathawhna hmun dangte khar a ni a, hei vang hian US-a hna chan hi mi nuai 39 dawn an awm tawh a ni.
US hi khawvela Covid-19 hri kai tamna ber leh he hri vanga thi tamna ber ni mah se, inkhuahkhirhna kalpui mek chu thlahdul a tum chho ṭan a, khawvela theme park lian ber Walt Disney World chu July 11-ah state governor-in rem a tih chuan hawn tum a ni a, MGM Resort pawh July 4-ah hawn tum a ni bawk.
Khawvelah hri vanga thi 3,49,000 awm tawh
Khawvel pumah Covid-19 vanga thi chu nimin thleng khan mi 3,49,095 an tling tawh a, hri kai hmuh chhuah tawh hi mi 54,88,825 an tling tawh bawk.
America (North leh South America) ah hri kai hi mi 24,95,924 awmin mi 1,45,810 in an thihpui tawh. Europe-ah hri kai hmuh chhuah hi 20,61,828 awmin an zinga 1,76,226 in an thihpui tawh bawk a ni.