Israel-Hamas war : Hamas hotuin Egypt a thleng

Hamas firfiak pawl hotu, Ismail Haniyeh chuan Nilaini khan Gaza Strip chungchang leh thil dang ngaihtuaha inbiakna nei turin Egypt khawpui, Cairo a thleng.

Gaza Strip-a Israel leh Hamas inbeihna thleng mekah inkahhai puang tura nawrna a nasa hle a, hei vang hian Hamas hotu pawh hi Israel nena an mi hren mekte inthleng tawna, indo chawlh a nih leh theihna tura inremna siam dan turte chu Egypt lam hian an sawipui dawn a ni.

Haniyeh hian a hmain Qatar-ah Iran foreign minister Hossein Amir Abdollahian a lo hmu tawh bawk.

Israel prime minister Benjamin Netanyahu chuan Hamas-hoin Israel mi an la hren mek chhungte a lo hmu tawh bawk a, Hamas mi hrente chhuah zalen an nih theih dan ngaihtuaha hma lain, Israel spy chief chu Europe-ah ṭum hnih a tir chhuak tawh tih a sawi. Hamas-ho hian Gaza-ah hian October 7-a Israel an beih ṭuma an mi man zinga mi 129 an la hreng mek nia hriat a ni a, 'Hamas mi hrente chhuah vek an nih theihna tura hma lak hi kan tih tur a ni a, hei hi ka mawhphurhna a ni," tiin Prime Minister chuan a sawi.

Israel spy agency, Mossad hotu David Barnea chuan CIA director Bill Burns leh Qatar prime minister Sheikh Mohammed bin Abdulrahman Al Thani a hmu tawh a ni. Qatar hian a hmain Egypt leh US puihna hmangin, Israel leh Hamas-te hi tang inthleng tura indo chawlhsan lailawkna inremna a lo siampui tawh a ni. Ni sarih indo chawlhsan a nih chhung hian Hamas chuan Israel mi an hren mek mi 80 chhuahin, Israel lam pawhin an ram tan in hrang hranga Palestinian tang zinga mi 240 an chhuah hman bawk.

Gaza-a Hamas mi hren mekte chhuah an ni a, Gaza Strip-a harsatna tawk mipuite chhawmdawlna phurh luh a nih theihna turin Israel chuan indo chawlh lailawkna tur inremna siam leh chu a inpeih thu Israel president Isaac Herzog pawhin a lo sawi tawh bawk.

UNSC-in vote lak hun sawn

UN Security Council-a Gaza Strip-a chhawmdawlna tam zawk thawn luh leh, heng chhawmdawlna sem darh dan UN enpuina hnuaiah dah phut chungchanga vote lak hun chu sawn a ni.

World Food Programme chuan Gaza-a cheng zinga a zahve zet chuan ei tur mumal an nei tawh lo niin a sawi a, Egypt ramri kaltlanga hun eng emaw chen chhawmdawlna phurh luh a nih hnuah, Nilaini aṭang khan Jordan aṭangin phurh luh a ni ve leh tih a sawi. Hetih lai hian ei tur an phurh luhte hi Gaza mipui mamawh aṭanga 10% vel chauh a la tling tih a sawi bawk.

UNSC-a vote lakna tur resolution-ah hian Gaza mipuite chhawmdawlna tur tam zawk thawn luh a, chhawmdawlna lutte sem chhuah chu UN kutah dah rawt a ni. Gaza-a chhawmdawlna lutte hi tun thleng chuan Israel thunnuna hnuaiah vek an la awm, phurh luh zat tur leh sem chhuah dan pawh Israel lamin a enpui zel a ni.