Shanghai khawpuiah kum 40 chhunga khaw vawt ber thleng

China financial hub, Shanghai khawpui chuan kum 40 chhunga December thla vawh ber ṭum a tawng mek. Thuneitute chuan khaw vawt hian zual lam a la pan zel theih tur thu an sawi bawk.

Nimin khan Shanghai khawpui vawh lam hi minus 4 - minus 6 degree Celcius a tling a, Shanghai Meteorological Bureau chuan December 25 thleng khaw vawt lam hi zero hnuai lam a la ni dawn tih a sawi.

Kumin khua a vawh zualna chhan hi kar liam taa Siberia aṭanga thli vawt tak tlehin China ram pum a tuam vang nia sawi a ni a, hmar lama province hrang hrang chuan December thla vawh ber ṭum record an siam chho hlawm a ni. Thli vawt tleh hian kawngpui, rel leh air transportation thlengin a nghawng a, online food delivery sector pawhin an buai phah bawk a ni. Khaw vawt nghawng zelah hian China ram pumah thlai man pawh a sang chak hle a, commerce ministry chuan ni tin mamawh supply kawngah harsatna a awm lohna turin ruahmanna a siam thuai dawn tih a tarlang.