Hamas-in an mi hrente chhuah tum tawh rih lo
Israel leh Hamas-te Gaza strip-a an inbeih mek karah an mi hrente inchhuahsak tawnna tura inkahhai puan a nih chu hun eng emaw chen pawhsei chhunzawm a ni tawh a, mahse, Hamas chuan nimin khan thuchhuah siamin, Israel-in indo tihtawp an remtih hma chuan an mi hrente chhuah chhunzawm an tum loh thu an puang.
Hamas-te hian Israel an beih ṭuma an mi man mi 100 chuang an chhuah tawh a, hetih lai hian mi 120 chuang an la hreng mek nia hriat a ni thung. "Palestinian ram anga thutlukna siam a ni a, kan mi mante inthleng tawnna chungchangah hian indo tihtawp a nih hma chuan inbiakna neih ni tawh lo se tih a ni," tiin an tarlang. Mahse, Palestinian ram anga thutlukna siam an tih lai takah hian tute nge an sawi tel tarlan a ni lo a, Gaza strip-a awm, pawl te zawk, Islamic Jihad te sawina a nih rin a ni. Islamic Jihad te hian Israel mi an hreng ve nia hriat a ni bawk.
Hetih lai hian Israel Prime Minister, Benjamin Netanyahu chuan Israel-in a thil tum zawng zawng a puitlin hma chuan indo chu chawlhsan a tum loh thu a sawi ve bawk. Israel hian Hamas mi hrente chhanchhuah nan sipai hmanga Hamas-te nawr chhunzawm zel a tum thung a, rescue operation-te a la kalpui reng thung a ni. Amaherawhchu, heng operation kaltlang hian mi pakhat chiah an la chhanchhuak thei thung a ni.
Darkar 48 chhungin mi 400 dawn thi
Hamas hnuaia health ministry chuan ni 2 liam ta chhung khan Gaza strip-ah mi 400 dawn thah an ni tawh tih sawiin, mi 734 te chuan hliam an tuar bawk niin an tarlang. October 7-a indona a chhuah aṭangin Palestinian mi 20,000 an thi tling tawh niin health ministry chuan an sawi bawk. Indonaa thi zinga 70% hi hmeichhia leh naupang an ni.
Hamas chuan indona a chhuah hnuah ni tin mi 300 thi ziah ang an nih thu sawiin, doctor-te chuan indona karah thi zat dik tak hriat a har thu an sawi.Thi zat an sawi aia a tam theih thu leh, building chim hnuaia ruang hmuh loh awm tur leh damdawi in thleng lo ruang eng emaw zat an awm ngei an rin thu an sawi.
Khawvel ram hrang hranga indona avanga thi zat chhiar leh chhui kawnga mi thiam bik, Prof. Michael Spagat chuan tuna Israel leh Hamas indonaa thi an awm chhoh dan chu a chak ber pawl niin a sawi a,"2008 aṭanga Gaza-a indona thleng hrang hrang thlir letin, tun ṭuma indona avanga mihring thi zat leh inthahna rawng tak tak thleng hi a tam filawr a ni," a ti.
US-in UN Security Council resolution thlawp
United Nations-a US Ambassador, Linda Thomas-Greenfield chuan Gaza-a indona thleng mek chungchanga UN Security Council resolution siam ṭhat chu US chuan a thlawp tur thu a sawi.
Draft resolution thar berah hian UN Security Council chuan Gaza-a a rang lama ṭanpuina pek dan kawng ngaihtuah a rawt a, indona tihtawp dan kawng zawn erawh dah tel a ni ta lo a ni. Resolution pawm tur hian nimin khan vote lak a ni a, he thu buatsaih lai thleng hian UN security council resoution hi pawm a ni em hriat a ni ta lo a ni. US hian UN Security Council resolution siam hnuhnung ber chu an ṭawngkam hman avangin a lo veto tawh a ni.