France-in Niger-a an embassy khar dawn

Sorkar lai paih thlaa sipai sorkar din a nih hnuah Niger-a France embassy chuan sipai sorkarin khuahkhirhna hrang hrang a siamsak avanga harsatna an tawh thu sawiin, Niger-a France embassy chu an khar tur thu an puang.

Niger-a France ambassador hlui, Sylvain Itte chuan embassy-a Niger mi an chhawrte pawh ban an nih tawh thu sawiin, amah leh embassy-a thawk mi eng emaw zat chuan September thla khan Niger ram hi an lo chhuahsan tawh bawk a ni.

July thla khan Niger-ah hian President Mohamed Bazoum kaihhruai sorkar chu sipaite hian paihthlain sipai sorkar an din nghal a, hemi hnu hian Niger-a sipai sorkar hian France ambassador hi an ram chhuahsan tura nawrin, embassy an chhuahsan theih loh nan an hual chhunzawm a ni. Sipai sorkar din a nih hnu lawk hian France embassy hi pro-junta thlawptu mi sang chuangin an bei a, tuna embassy khar tura an puan hi Niger-a sipai sorkarin France sipaite'n an ram chhuahsan nana hun tiam an siam a tawp hma chiah a ni. Niger-ah hian France sipaite hi ram chhunga Al-Qaeda leh Islamic state te nena inthlunzawm firfiakte beih letna kawnga ṭanpui tura dah an ni.