Israel-Hamas war : Indonaah Israel sipai 153 an thi tawh

Israel prime minister Benjamin Netanyahu chuan Gaza-a indona an hmachhawn mekah an tuar nasa hle tih a sawi a, hemi rual hian firfiakte beih chhunzawm zel loh chu thlan tur dang an nei lo tih a sawi.

Zirtawpni khan Hamas firfiakten nena an inbeihnaah Israel sipai 14 an thih belh leh a, heng miten nen hian October 7 aṭanga Gaza Strip-a indonaa Israel sipai thi hi 153 an tling ta a ni. Hetih lai hian Hamas rorelna hnuaia awm, Gaza Strip-a health ministry chuan indonaah hian Gaza-ah mi 20,000 chuang an thi tawh a, thi zingah hian naupang leh hmeichhia a tam zawk an ni tih a sawi. Hliam tuar 54,000 vel an awm tawh bawk niin a tarlang.

Israel PM Netanyahu chuan an sipaite an thih belh leh chu an tan ni hrehawm tak a ni a ti a, mahse an sipaite chuan thapui thawhin a tawp thlengin an bei zel dawn a ni, a ti. An tum ber chu Hamas firfiakte nuai chimih leh, an mi hren mekte dam taka hruai kir leh vek a ni tih a sawi nawn leh bawk. "Chiang taka ka sawi duh chu, he indona hian rei tak a awh dawn a ni," a ti. Israel sipaite hian Gazsa hmar lam chu an thunun tawh niin an sawi a, hmun dangah nasa zawkin beihpui thlak chhunzawm zel an tum. Chhimlama Hamas chakna bialah pawh sipaite hi an lut ṭan niin Israel Defence Force (IDF) thupuangtu chuan a sawi.