Pope-in Hamas mi mante chhuah tur leh Gaza indona titawp tawh turin ngen

Roman Catholic hotu, Pope Francis chuan Krismas pual thuchah a sawiah, Gaza Strip-a Israel leh Hamas indona chu titawp tawh tur leh, Hamas firfiakten Israel an beih ṭum an mi man, tun thlenga an la hren mekte chu chhuah zalen vek turin a ngen.

Krismas nia Vatican-a St Peter's Basilica-a kalkhawmte hmaah thu sawiin, Pope Francis chuan Israel leh Palestinian-te inbeihna thleng chu pawi a ti thu a sawi. October 7-a Hamas firfiakten Israel an beihna tuartute a lainat hle tih a sawi a, tun thlenga mi eng emaw zat an la hren mekte chu chhuah thuai turin a ngen bawk. Israel sipaite beihpui thlakna avanga civil mi tawrhna nasa thleng pawh tawp thuai tawh se a duh thu leh, indona avanga harsatna tawk mipuite chhawmdawlna pekna tur kawng hawnsak turin a ngen bawk a ni.

Hamas-te hian Israel nena ni sarih inremna an siam chhung khan an mi hren zinga mi eng emaw zat an chhuah a, mahse tun thlengin mi 132 chu Gaza-ah an la hreng chhunzawm nia hriat a ni.

Pope chuan Russia nena indo mek, Ukraine ramah pawh boruak muanawm a awm a duh thu a sawi. Tualchhung indonain a tihbuai reng,Syria,Lebanon leh Yemen ramahte boruak ṭha a awm theihna atan a ṭawngtai sak thu a sawi bawk.