Israel-Hamas war : 'Hnehna kan chan hma chu kan tawpsan dawn lo' - Israel PM

Israel-in Hamas firfiakte bei a, Gaza Strip-a beihpui an thlak mekah khawvel ram hrang hrangten inkahhai puang turin nawr reng mah se, Israel prime minister Benjamin Netanyahu chuan hnehna an chan hma chuan an tawpsan dawn lo tih a sawi.

Prime Minister Netanyahu hian Thawhṭanni khan Gaza hmarlama Israel sipaite a tlawh a, media ṭhenkhatin inbeihna an tawpsan dawn nia an sawi chu thu dik lo a nih thu leh, Hams firfiakten an beihna chu an chhunzawm zel dawn tih a sawi. "Kan tawp mai dawn lo. He indona hi a tawp thlengin kan kalpui dawn, a bak sawi tur dang a awm lo," a ti.

Hetih lai hian ram hrang hrang, Israel ṭhianṭha US thleng pawhin Gaza Strip-a inkahhai puang tur hian Israel an nawr reng a ni. US chuan Gaza aṭanga tlanchhuak duh, mipuite tana kawng hawng tur pawhin a ngen a, mahse a ngenna hian awmzia a nei rih lo.

Gaza-a awm, United Nations team leader Gemma Connel chuan Gaza dinhmun chu a chhe tak zet tawt tih sawiin, mipuite chu tlanchhiat duh mah se khawi hmun nge him tih engmah a hriat tawh lo a ni, a ti. Hmun danga insawnchhuak tura thupekte a awm a, an insawnchhuah pawhin an tlanchhiatna hmunah chuan an him chuang lo niin a sawi. UN official-te chuan Israel-in a hrekna avangin Palestinian mipui hmun lia ṭhena hmun khat chu ei tur khamkhawp pawh nei loin an awm tawh niin an sawi bawk.