Drug lord El Chapo ngenna court-in a hnawl

US court chuan Mexican drug lord, Joaquin 'El Chapo' Guzman-a'n kum 2019-a dam chhung tang tura hremna pek ngaihtuah nawn tura a ngenna chu a hnawlsak.

Kum tam tak chhung ruihhlo tawlhru pawl, Sinaloa cartel hotu lo ni tawh, kum 66 mi Guzman hi Mexico-a mi tam tak thihnaa mawhphurhtua puh a ni. Man a nih hnuah kum 2017 khan US-ah thawn niin, kum 2019 khan ruihhlo tawlhruk thubuaiah thiam loh chantir a ni a, dam chhung tang tura hrem a ni. Tunah hian Colorado tan-in, 'Alcatraz of the Rockies' tihah a tang mek a, he hmunah hian tangte chu ni khatah darkar 23 chhung khung hran an ni ṭhin.

Sinaloa cartel hi Mexico rama criminal organisation hlauhawm leh thiltithei pahnih zingah a tel reng a, he pawl hi Guzman-a fapa paliten an la kaihruai a ni.

New York Eastern District judge Brian Cogan chuan Guzman chu kum tam tak chhunga pawikhawihtu hlauhawm ber chungthu ngaihtuahsak a ni mai thei tih sawiin, a thubuaite hi thi tura hremna pek theihna hial zawk a ni tiin, Guzman-a petition thehluh hi a hnawlsak a ni. Hei bakah hian Guzman hian a hmingin awm tawh lo mah se, dollar tluklehdingawn tel assets chu a la thunun vek tho niin court chuan a sawi bawk.