US-in Ukraine ṭanpuina tur USD mtd 250 hu pe chhuak dawn

United States chuan Russia nena indo mek, Ukraine ṭanpuina USD mtd 250 hu a pe chhuak thuai dawn tih a sawi. Hei hi kumin chhunga ṭanpuina a pek hnuhnun ber tur a ni .

Secretary of state Antony Blinken chuan thuchhuah siamin, "Ukraine-in a ram venghim tur leh, Russia-in awpbeh a tumna laka zalenna nei tura a beihnaa kan puih hi a pawimawh hle a ni,' a ti. Ukraine ṭanpuina an pek tur zingah hian artillery ammunition leh air defence systems bakah, anti-armor munition te, Javelin anti-tank systems leh Stinger anti-aircraft missile te an tel.

Kum 2022, February thlaa Russia-in Ukraine ram a run hnuah, US hian Ukraine sipaite puihna tur hian USD tld 44.3 hu ṭanpuina a pe tawh. Hetih lai hian President Joe Biden-a'n Congress-a Ukraine puihna tur fund pek belh tura a ngenna chu Republican lamin an dan sak a, tun thla tir lam khan Senate-ah Ukriane tana USD tld 5d0 leh Israel tana USD tld 14 pek rawtna pawh an paihthlak sak bawk. Member-te chuan US-Mexico border kaltlanga nan rama pem lut pung zel leh, hemi avanga an buaina neih mekte vangin President rawtna hi an dang a ni.