Maine primary ballot aṭangin Trump disqualify ve leh

Kum 2024-a US President thlanna neih tura Republican party candidate chuh tum, president hlui Donald Trump chu Maine state-a primary ballot aṭangin disqualify a ni ve leh. Hemi hma hian Coloardo primary aṭangin disqualify a lo ni tawh bawk.

President hlui hi kum 2021, January 6-a Capitol-a buaina nasa tak chhuaka inhnamhnawiha puh a nih chungchangah state pahnihte hian primary ballot-ah a tel ve hi an khap ta a ni.

Trump hian Colorado thutlukna hi Supreme Court-ah khin let a tum thu a lo sawi tawh a, Colorado Republican Party chuan Nilaini khan Supreme Court-ah a hranin an appeal bawk. Maine thutlukna pawh hi state court-ah appeal theih a ni bawk ang. State danga Trump disquality tumna erawh hnawl a ni thung.

US President thlan turah hian Republican party presidential candidate chuhte hian state tinah primary ballot hi an hmachhawn a ngai a, Republican member-ten an lo thlang dawn a ni. Primary ballot-a hmu ṭha ber hi official party president candidate a ni ang a, party convention-ah official candidate hi puan ṭhin a ni.