Russia-in drone leh missile 150 chuangin Ukraine bei

Russia chuan nimin khan Uraine khawpui hrang hrangte na takin a bei leh a, missile leh drone 150 chuang kap chhuakin, mi tam tak an thi a, hliam tuar eng emaw zat an awm bawk. Ukraine official-te chuan Russia-in Ukraine a run hnua boruak aṭanga beihpui a thlak nasat ber ṭum niin an sawi.

Drone leh missile hmang hian Ukraine khawpui, Kyiv baka khawtlang lama Lviv khawpui aṭanga khawchhak lama Kharkhiv thlengin beih a ni. Infrastructure tam tak an tichhia a; factory, hospital leh school thlengin an kap tel nia sawi a ni. Thil an tihchhiat dan kimchang tak hi hriat chian a la ni lo tih ans awi bawk.

Ukraine sipai hotu chuan an ram air defence chuan Russia kah chhuah zinga drone 27 leh cruise missile 87 chu an kap thla niin a sawi.

Ukraine president Volodymyr Zelenskyy chuan Russia chuan a ralthuam neih zawng zawng hmangin Ukraine chu a bei mek a ni, a ti. Russia beihna avang hian Ukraine-a region pali chuan nimin khan power supply lamah harsatna an tawh phah a ni.

Khawthlang ramte chuan Russia beihletna tur hian Ukraine hi air defence system chak tak pawh lo pe tawhin, Russia-in a beihna tur tam tak hi an lo dang thei a ni. Mahse Russia missile lo kahthlakna tur hian Ukraine hian ralthuam hi a ngah tawk lo a ni. Russia nena an inhmachhawnna, front line hi mel 600 chuanga thui a ni a, hei vang hian anti-air defence system hi heng hmunah hian Ukraine sipaite venna tura rualkhai taka sem a ngai bawk a ni. Hei vang hian front line leh khawpui hrang hrang venan tur hian supply hi an ngah tawk lo a ni.