Myanmar sipai sorkarin tang 10,000 dawn ngaidam

Myanmar sipai sorkar chuan an ram zalenna champha vawi 76-na pualin, nimin khan tang 10,000 dawn a ngaidam.

Sipai sorkar enkawl, MRTV chuan military council hotu, Senior General Min Aung Hlaing chuan an ram mi tang 9,652 a ngaidam tih a puang a, heng bakah hian ram dang mi tang zinga 114-te ngaidam bawkin, heng mite hi an rama thawn haw an ni tih a sawi.

Tang ngaihdamte hi nimin aṭang khan chhuahtir ṭan an ni a, mahse, an zingah hian sipai sorkar dodaltu an mante telh an ni em tih erawh sawi chian a ni lo. Tang chhuahte nihna kimchang pawh sawi lan a la ni lo bawk.

Kum 2021, February thlaa sipaite'n civil sorkar thuneihna hnehchhuh a, sorkarna an siam hnu khan mi 25,730 zet an man tawh a ni. Heng an mi man zinga mi 19,930 chu Nilaini thleng khan chhuah an la ni lo tih Assistance Association for Political Prisoners chuan a tarlang. Sipai sorkar duh lo a, tualchhung buaina chhuak avangin security force-te hian mi 4,277 vel an that tawh bawk.

Nimin khan sipai sorkar chuan an ram khawpui, Naypyitaw-ah an ram zalenna champha lawmna hi City Hall-ah neiin, military parade-te an buatsaih a ni. Independence Day lawmnaah hian military council vice-chairman, Vice-Senior Gen. Soe Win chuan Min Aung Hlaing thuchah a sawi a, state television-ah live-a tihchhuah a ni. Sipai sorkar chuan an ram inthlanpui a buatsaih tur thu leh, mipuite an aiawh tura an thlan chhuahte hnenah thuneihna an hlan chhawn tur thu a sawi a, mahse, inthlan neih hun tur erawh a sawi lang lo.