Russia leh Ukraine-in tang inthleng

Russia leh Ukraine chuan an mi man tam tham tak an inthleng a, kum 2022 February thlaa Russia-in Ukraine a run hnua ṭum khata tang an inthleng tam ber ṭum a ni.

Ukraine official-te chuan Nilaini khan Russia mi an man zingah mi 248 te an chhuah tih an sawi a, Russia pawhin United Arab Emirates (UAE) hmalaknaa inbiakna an neih hnuah Ukraine sipai leh civil mi an man 230-te an chhuah tih an sawi ve bawk.

Ram pahnihte hian an indo hnuah an mi mante hi ṭum eng emaw zat an inthleng tawh. Mahse tang inthleng tawnna hi nikum kum chanve hnu lam aṭang khan an chawlhsan a, Nilaini khan an inthleng leh ta a ni. Ukraine president Volodymyr Zelenskyy pawhin Russia-in a chhuah, Ukraine sipai leh civil 200 chuangte chu an ramah an rawn kir tawh tih a sawi.

Hetih lai hian ram pahnihte hi an la inbei chhunzawm reng a, Russia chuan Nilaini khan an ram chhim lama ramri bulah Ukraine missile 12 an kap thla tih a sawi. Belgorod region governor, Vyacheslav Gladkov chuan Ukraine hian missile leh drone hmangin an bial chu a bei reng niin a tarlang a, Russia president Vladimir Putin chuan Belgordo bial beitute chu hrem lohin an chhuak dawn lo tih a sawi zui. Ukraine lam chuan kar liam ta Zirtawpni aṭang khan Russia chuan drone leh missile 300 chuangin Ukraine ram a kap tawh tih an sawi ve bawk.