Iran-in an rama bomb puakah Israel leh US mawhphurtuah puh

Iran chuan Nilainia an ram chhim lama bomb vawi hnih puakah mi 95 an thih phahnaah, Israel leh US chu mawhphurtuah a puh.

Nilaini khan kum li liam taa US beihpui thlaknaa thi, Revolutionary Guards general Qasem Soleimani hriatrengna, Kerman-a Martyrs Cemetary-a hun hman laiin a thlan bula mipui pun khawmnaah ṭum hnih bomb a puak a ni. Mi 95 vel an thih bakah, hliam tuar mi 200 chuang an awm bawk. Bomb tipuaktute hi hriat an la ni lo a, mahse, Iran chuan Israel leh US chu pawikhawihna thlen chhanah hian a puh. US chuan he thilah hian an ram emaw, Israel emaw inhnamhnawihna engmah a awm lo tih a sawi a, Israel lam erawh chuan an puhna hi an chhang let lo. Israel sipai thupuangtu, Daniel Hagari chuan Hamas nena an inbeih mekna lamah chauh an insawrbing niin a sawi.

Iran supreme leader, Ayatollah Ali Khameinei chuan pawikhawihna rapthlak tak thleng chu an ram hmelmate thiltih a ni tiin, na taka an chhan let tur thu a sawi. Turkey rama zin, Iran president Ebrahim Raisi pawhin pawikhawihna thleng a dem thu sawiin, a zinna aṭangin nimin khan a haw nghal a, nimin khan an ram pumah bomb puak avanga thite sunna ni atan a puang nghal bawk. Iran mipuite hian Soleimani hi an ngaihlu hle a, a puala hun pawimawh tak hmanaah venhimna lam kengkawh zo loah sorkar leh tualchhung security official-te an puh. Kum 2020-a Soleimani vuinna inkhawm neih ṭumah pawh Nilainia bomb puahna hmunah vek hian mipui pung khawmte an innekbuai a, mi 60 vel zetin an lo thih phah tawh bawk a ni.