Beirut-a surgical strike neihah Hamas hruaitu a thi

Israel sipaite'n Lebanon khawpui, Beirut-a surgical strike an neihah Hamas hruaitu, Saleh al-Arouri a thi.

Israel chuan Beirut-a surgical strike an neih chu Lebanon ram an beihna a ni lo tih a sawi a, hetih lai hian Hamas lam chuan an hotu thihna chu phuba lak ngei an tum tih an sawi. Hamas thlawptu, Lebanon-a Hezbollah firfiak pawl pawhin Israel sipaite chet dan chu Lebanon ram beihna tiin an puh bawk.

Lebanon media lamin an tarlan danin, Hamas deputy leader Saleh al-Arouri hi Beirut chhim lama drone hmanga beihnaah a thi niin an tarlang a, ani bakah midang paruk thiin, hengte hi Hamas military commander pahnih leh an member pali an ni. Arouri hi Hamas armed wing, Qassam Brigades-a an hruaitu pawimawh tak niin, Hamas hotu lu ber Ismail Haniyeh nen pawha inpawh ṭha tak an ni. Lebanon-ah hian Hamas leh Hezbollah-te inzawmna ṭha tak siamtu a ni bawk.

Israel thupuangtu, Mark Regev chuan Arouri an thah thu hi sawi mah se, an chet dan chu Lebanon ram emaw, Hezbollah pawl emaw an beihna a ni lo tih a sawi. Surgical strike titu hian a tum ber chu Hamas hruaitu hi a ni tiin, Beirut chhim lama Hamas office chauh chu beih a nih thu a sawi. Arouri hi kum 2014-a West Bank-a Israel mi pathum ruk bo leh thah an nihnaah pawh inhnamhnawiha puh a ni a, hei bakah pawikhawihna dang avangin Israel tan inah pawh a lo tang fo tawh a ni. Nikum October thla khan West Bank-a a in chu Israel sipaite'n an lo tihchhiat sak tawh bawk a ni.

Israel prime minister Benjamin Netanyahu chuan Hamas hruaitute chu khawi hmun leh ramah pawh awm se an um zui a, an nuai bo zel tur thu a lo sawi tawh a ni. October 7, 2023 aṭanga Hamas nena an inbeihnaah Israel hian a sipai 173-te a chan tawh a ni.