Japan airport-ah thlawhtheihna insu, mi 5 an thi

Japan khawpui, Tokyo-a Haneda airport-ah nimin khan Japan coast guard thlawhtheihna leh khualzin phurtu, Japan Airlines thlawhtheihna an insu a, mi panga an thi.

Thlawhtheihna pahnih insut hnu hian an kang zui a, mahse, Japan Airlines thlawhtheihnaa chuang mi 379 leh thawktute chu him taka hruai chhuah an ni. Coast guard thlawhtheihnaa chuang mi paruk zinga pangate erawh an thi a, a dam chhun captain chuan hliam na tak a tuar. Khualzin phur thlawhtheihna hi Airbus 350 niin, New Chitose Airport aṭanga rawn thleng a ni a, a phurh zingah hian naupang pariat an tel. Coast guard thlawhtheihna hi Ishikawa prefecture pan tur niin, lirnghing tuarte tana chhawmdawlna pe tura kal tur a ni. Japan ramah hian thlawhtheihna chetsualna lian tham hi a thleng khat hle. Chetsualna thleng rapthlak ber chu kum 1985 kha niin, Tokyo aṭanga Osaka pan JAL jumbo jet chu Gunma region-ah tlain, mi 520 an thi a ni.

Lirnghing vanga thi mi 62 an tling tawh

Kum thar ni, January 1-a central Japan-a lirnghing na tak thleng vanga thi chu mi 62 an tling tawh a, hliam tuar hi 300 chuang awmin an zinga mi 20-te chu an dinhmun a ṭha lo hle nia sawi a ni.

Thawhṭanni khan Japan-ah hian magnitude 7.6-a nain lir a nghing a,hemi hnu hian aftershock hi ṭum 140 chuang a thleng leh tawh a ni. Ishikawa prefecture-in tuar nasa berin, chenna in eng emaw zat a chim a, tui leh power supply pawh a buai phah bawk. Chhanchhuah hna thawh chhunzawm zel niin, in chim hnuaia tangte an la awm nia hriat a ni. Prime minister Fumio Kishida chuan nimin khan emergency task force-te meeting neihpuiin, chhanchhuah leh chhawmdawl hna kalpui dan turte a sawipui.