Japan-ah chin hriat lohin mi 250 dawn la awm

Japan rama kum thar nia lirnghing na takin chhiatna a thlen tuartu zinga mi 250 dawn chu nimin thleng khan an chin hriat a la ni lo a, nung dama hmuh beiseina a tlem tawh hle.

Chin hriat loa la awmte hi mi 242 an la ni a, chhanchhuah hna thawktute chuan theihtawp chhuah mah se dama an hmuh an beisei tawh lo a ni. Nimin thleng khan magnitude 7.6-a naa lirnghingin chhiatna a thlena thi hi mi 92 an tling tawh.

Japan Self Defence Force chuan lirnghing tuarte chhanchhuah leh chhawmdawl hna hi an thawk a, mi 4,600 an chhan chhuak tawh tih Kyodo news agency chuan a tarlang. Hetih lai hian chin hriat loa la awmte hi in chimin a delhte nia hriat an ni a, a bikin Suzu leh Wajina khaw mite an ni deuh ber.

Mi sing tel chu power leh tui supply nei loin an la awm a, tam tak chu leiminte'n kawng a dan avangin ṭanpuina dawng hlei thei loin an awm mek bawk. Japan prime minister Fumio Kishida chuan in chimin a delhte nung dama hmuh beiseina tlem tawh mah se chhanchhuah hna thawh hi an tawpsan mai dawn lo tih a sawi a, harsatna tawk mekte ṭanpui hna chu theihtawp chhuaha thawk zel turin a chah bawk. PM hian nimin khan hma lak zel dan tur ngaihtuahin disaster response official-te meeting a neihpui a ni.

Japan sorkar chuan lirnghing tuarte ṭanpui leh chhawmdawlna tur hian an reserve budget aṭangin an ram pawisa, yen tld 4.74 (USD mtd 34) an thehchhuak dawn tih a sawi.