Kim Jong-un thlak tura rinkai ber; a fanu Kim Ju Ae

North Korea ram hotu lu ber, Kim Jong-un fanu, Kim Ju Ae chu a pa thlaktu tura rin kai ber a ni tih South Korea spy agency chuan a sawi. National Intelligence Service hian Kim-a thlaktu tura a fanu rin a nih thu a sawi chhuah ṭum khatna a ni. Tun hnai chhoa mipui hmaa a inlan dan aṭangin, Kim Jue Ae chu a pa thlaktu tura rinkai ber a nih thu hi an tarlang. Hemi rual hian Kim Jong Un hi a la naupangin a la hrisel ṭha a, thil tam tak inthlak danglam leh thei a nih thu an sawi tel bawk.

Kim Ju Ae hi Kim fa upa ber dawttu niin, kum 10 mi vel chauh nia hriat a ni. Mahse missile test leh military parade-ah pawh a pa hi a lo zui fo a, nikum December thla pawh khan Hwasong-18 solid-fuel intercontinental ballistic missile (ICBM) kahchhuahnaah a zui a ni. Kim fanu chungchang hi vantlang hriatah kum 2013 khan sawi chhuah a ni chauh a, hei pawh hi American basketball star Dennis Rodman-a'n North Korea a zin ṭumin Kim-te chhungkaw bula hun a hman thu leh, an naute pawh a pawm thu a sawi chhuah aṭangin hriat a ni. North Korea hotu hian a chhungte chungchang hi a sawi chhuak ngai lo a, a nupui Ri Sol Ju ngei pawh an inneih hnu kum eng emaw zat chhung chu a thup tlat a ni.

North Korea hian nimin khan South Korea nena an inrina tuipui bulah artillery shell 200 chuang a kap chhuak a, hei vang hian South Korea chuan an ram thliarkar pahniha chengte chu insawn chhuak turin a hriattir. North Korea artillery shell kah chhuah hian thil tihchhiat lian tham a neih hriat a ni lo a, mahse, an chet dan chu 2018 military agreement bawhchhiatna a nih thu South Korea Joint Chiefs of Staff chuan a sawi. North Korea chet dan chu a ṭul dan anga an chhan let tur thu an sawi bawk.