Islamic State-in Iran-a bomb tipuaktu an nih thu sawi

Islamic State firfiak pawl chuan Nilainia Iran-a Qassem Soleimani hriatrengna hun hmannaa bomb pahnih puak chu an tih a nih thu an sawi. Bomb puakah hian mi 100 dawn an thi a ni.

Sunni Muslim pawl hian an pawl Telegram channel-ah thuchhuah siamin, an member pahnihte chuan Iran chhimchhak lam, Kerman khawpuia thlanmuala pung khawmte zingah thihchilh bomb an pai chu an tipuak tih an sawi. IS lamin thuchhuah an siam hma hian, Iran chuan he pawikhawihna thlen chhanah hian Israel leh US inhnamhnawihna neiah a puh. Mahse US chuan inhnamhnawihna an neih loh thu leh, Israel pawh a inrawlh an rin loh thu a sawi.

United Nations Security Council chuan Kerman-a pawikhawihna rapthlak thleng hi an dem thu an sawi a, nunna chan chhungte leh hliam tuarte bakah Iran sorkar an tawrhpui thu an sawi. Nimin khan bomb puaka thite hi vui an ni a, hemi rual hian pawikhawihna thleng duh lohna lantirna huaihawt a ni nghal bawk. Islamic State hian kum 2022 khan mi 15 thihna, Iran-a Shi'ite shrine beihna chu an pawl tih a nih thu an lo sawi tawh a, 2017 lkhan Iran Parliament leh Ayatollah Ruhollah Khomeini thlan beiin bomb an lo tipuak tawh bawk a ni.