Bangladesh ram inthlanpui nei

Bangladesh ram inthlanpui chu nimin khan neih a ni a, eptu pawl lian ber Bangladesh Nationalist Party (BNP)-in inthlan hi an boycott avangin prime minister Sheik Hasina kaihhruai rorel lai party,Awami League chuan hnehna an chan leh ngei rin a ni.

Vote nei mi maktaduai 119.6 awmin, zing dar 8 aṭangin vote an thlak ṭan a, tlai dar 5-ah khar a ni. Election Commission chuan vote thlakna tur, polling station hi 42,000 chuang siam a ni tih an tarlang.

Constituency 300 awmin, heng zinga constituency pakhatah chuan candidate a thih avangin vote thlak hun hi sawn a ni a, constituency 299-ah inthlan hi neih a ni. Political party 27 aṭangin candidate hi 1,500 chuang an awm a, independent candidate 436 an awm bawk. Inthlan buaipui tur hian foreign observer 100 an awm bawk a ni.

Kum 76 mi, Prime Minister Hasina hian kum 2009 aṭang khan thuneihna hi a chang tawh a, a party Awami League hian 2018-ah hnehna a chang a ni. BNP hian kum 2014 khan inthlan hi a boycott a, 2018 inthlanah erawh chuan an tel. An party hotu, prime minister hlui Khaleda Zia hi eiruk thubuaia thiam loh chantirin, house arrest-a hrem mek a ni. Kumin inthlanpui buatsaih a nih dan chu a felfai tawk lo tiin an boycott leh a, nimin zing dar 6 aṭanga tukin zing dar 6 thleng ram pum huapin nawrh an huaihawt.

Inthlan neih hma ni, Inrinni khan ram chhung hmun eng emaw zatah buaina a chhuak a, khualzin phur rel chu hal niin mi pali an thi. Hmun tam takah building beih leh hal a ni a, polling centre 14 pawh hal an ni bawk.