Hezbollah-te'n rocket 60 chuangin Israel hmar lam kap

Lebanon-a Hezbollah firfiak pawl chuan Inrinni khan Israel hmar lama army base chu rocket 60 chuangin an kap tih an sawi. Hei hi an ram khawpui, Beirut-a Israel sipaite'n Hamas deputy leader an thah avanga an chhan letna niin an sawi bawk. Iran thlawp, Hezbollah chuan thuchhuah siamin, "Hei hi hruaitu ropui Sheik Saleh al-Aruri thah a nih chhan let bul ṭanna a ni. Hezbollah chuan Meron air control base chu missile hrang hrang 62-in a kap a ni," tiin an tarlang.

October 7,2023-a Israel-Hamas indona a chhuah aṭang khan, Hezbollah hian Hamas-te thlawpin an ramri, Israel hmar lam chu an bei fo a ni. Israel chuan Inrinnia Lebanon ram aṭanga rocket kah chhuah zinga 40 vel chu an lo kap thla tih an sawi ve bawk. Hmar lam ramri khaw hrang hrangah siren tihrik a ni. Israel-Lebanon ramria inbeihnaah hian mi 175 vel an thi tawh a, an zingah hian Hezbollah fighter 129 an tel. Israel sipai pakua leh civil mi pali an thi ve tawh bawk a ni.

Gaza-a Hamas command structure tichhia

Israel Army thupuangtu, Daniel Hagari chuan Gaza Strip hmar lama Hamas command structure chu an kah chhiatsak thu a sawi a, Palestinian firfiakte hi commander pawh nei loa an awm tawh thu a sawi.Hagari chuan Gaza hmar lamah hian Hamas firfiak 8,000 vel an that tawh tih a sawi a, Gaza ram laili lai leh chhim lamah Hamas-ho an thlurbing leh tawh dawn tih a tarlang bawk.

Israel prime minister Benjamin Netanyahu pawhin Hamas nuai chimit vek tura an beihpui thlakna chu an chhunzawm zel dawn tih Inrinni khan a sawi nawn leh bawk. Hamas ho mi hren mekte him taka chhanchhuah vek an tum thu leh, Gaza chu Israel tana mi hlauhawmte awm lohna tura siam tura an beih zel tur thu a sawi. "Hnehna kan chan hma chuan thil dang zawng zawng chu kan dah ṭha rih ang" a ti.