A term 5-na atan Bangladesh PM thlang tling leh

Bangladesh ram inthlanpui chu eptu pawl lian berin an boycott chungin Pathianni khan neih a ni a, prime minister Sheikh Hasina kaihhruai, rorel lai 'Awami League' chu hneh taka thlan tlin a ni. Hasina hian a term vawi ngana turin hnehna a chang leh ta a ni.

Election Commission chuan inthlanpui neih zawh takah Awami League hi seat awm zat aṭanga 50% chuangah an chak tih a sawi. Inthlan result kimchang hi official-a puan erawh a la ni lo.

Eptu pawl lian ber, prime minister hlui Khaleda Zia kaihhruai Bangladesh Nationalist Party (BNP)-in inthlan hi boycott in,vote thlak ni hian an ram pumah nawrh an huaihawt a ni. Hei vang hian vote tla pawh a chhe hle a, report tihchhuah chinah chuan vote tla hi 40% vel chauh a tling pha niin Chief Election Commissioner Kazi Habibul Awal chuan a sawi. Kum 2018 inthlanpuiah khan vote tla hi 80% a tling a ni.

Hetih lai lian PM Hasina chuan BNP chu firfiak pawl tia sawiin, an thiltih dan chu democracy palzutna a ni, a ti. PM chuan an rama democracy tundin a nih zel theihna turin theihtawp a chhuah thu a sawi. Nikum October 28-a BNP-te'n rally an huaihawt aṭang khan PM Hasina kaihhruai sorkar chuan eptu pawl member 10,000 chuang zet an man tawh niin Human Rights Watch chuan a tarlang. Nobel prize winner Yungus pawh Dhaka court chuan thla ruk tang turin a lo hrem tawh bawk.

Bangladesh TV station-te'n an tarlan danin, Awami League hian seat 299 aṭangin seat 216-ah hnehna an chang a, independent candidate-te'n seat 52 lain, Jatiya Party-in seat 11 an la ve bawk.