Israel-in Hezbollah an vau

Lebanon-a Hezbollah firfiak pawlin Israel hmar lama air traffic control base an beih hnuah, Israel sipai chuan Hezbollah chu an laka indona puanah a vau.

Israel sipaite chuan Iran thlawp Hezbollah hian Mount Meron-a an base chu an kap fuh tih an sawi a, mahse, backup system-te an hman vek avangin air defence lam erawh a nghawng tel lo. Israel sipai thi leh hliam an awm lo a, mahse, an structure-te erawh a chhe nasa hle. Israel-Hamas indona thleng mekah Hezbollah-in Israel a lo beih ve naah, tun ṭum hi pawikhawihna a thlen nasat ber ṭum niin an tarlang.

Israel military chief of staff, Lt.Col. Herzi Halevi chuan sipai chakna hmanga Hamas thurualpui, Hezbollah nawrna chu nasa taka kalpui a ngai tih sawiin, hei hian awmzia a awm lo a nih chuan indona dang pawh an hmachhawn mai a ngai dawn niin a sawi.

Israel prime minister, Benjamin Netanyahu pawhin Hamas an beih mekna aṭang chuan Hezbollah chu inzir tura an duh thu a sawi a, "Hezbollah chuan tun hnaia Hamas chunga thil thleng aṭang hian inzir se ka duh a ni. Firfiak hi tu mah khawih thiang lo an awm lo," tiin a cabinet-te hmaah a sawi.

Pathianni khan US secretary of state, Antony Blinken chuan Qatar leh Jordan ram hruaitute hmuin, Gaza Strip dinhmunte a sawipui a, Israel-Hamas indona thleng mek chu hmun danga a darh zel lohna tura hmalak dan turte an sawiho. Blinken hian UAE, Saudi Arabia, Israel, West Bank leh Egypt pawh tlawh leh a tum bawk.

Hezbollah chuan Israel military base an beih chu Lebanon khawpui, Beirut-a Israel sipaite'n Hamas deputy leader an thah avang an chhan let bul ṭanna a ni tih sawiin, beih chhunzawm zel pawh an la tum tih an lo sawi tawh a ni.