Pakistan-a bomb puakah police officer 5 an thi

Pakistan hmarthlang lama polio vaccination drive neihnaah nimin zing khan bomb a puak a, police officer panga an thih bakah hliam 20 chuang an awm.

Bomb puahna hmun hi Khyber Pakhtunkhwa province-a tribal district, Bajaur a ni. He bialah hian Pakistan sorkar chuan vaccination campaign round tawpna ber tur a kalpui mek a ni. Campaign neia kal, police team bulah bomb hi tihpuah a ni a, hliam tuarte hi damdawi inah dah nghal niin, an zing mi panga chu an dinhmun a ṭha lo hle niin provincial rescue services thupuangtu, Bilal Faizi chuan a sawi. Eng pawl mahin bomb tipuaktu an nih thu hi an la sawi lo. Tun hma lamin Pakistan Taliban, TTP tia sawi chuan polio vaccination worker leh security official eng emaw zat beiin an lo that tawh a ni.

Pakistan-ah hian US intelligencee agency, CIA-in Osama bin Laden man tuma an zawnnaah vaccination drive lem an lo kalpui tawh avangin, ram chhunga polio immunisation drive hian dodal a hlawh phah hle a ni. Pakistan-Afghanistan ramria sakhaw hotu ṭhenkhatte'n vaccine hian vawksa leh zu a keng tel nia sawiin, mipuite an sawi ṭhaih fo bawk.