China ramri bul khua aṭangin Myanmar sipaite inhnukdawk

Myanmar sipai sorkar chuan an ram hmarchhak lama China ramri bul khawpui, Laukkaing aṭangin an sipaite lak chhuah an ni tih a sawi. Sipaite nena an inbeih hnuah, he khawpui hi armed group-ho kutah a awm tawh a ni.

Laukkaing hi Kokang Self-Administered Zone khawpui a ni a, sipaite kut aṭanga laksak tumin nikum October 27 aṭang khan armed group ṭangrual pawl, 'Three Brotherhood Alliance' chuan beihpui an thlak a ni. He pawlah hian Myanmar National Democratic Alliance Army (MNDAA), Ta’ang National Liberation Army, leh Arakan Army an tel.

Myanmar sorkar thupuangtu, Maj. Gen. Zaw Min Tun chuan sipaite leh an chhungte himna turin Laukkaing khua aṭang hian lak chhuah vek an ni tih a sawi. Three Brotherhood Alliance pawhin Kokang bial pum chu sipai awpna lak aṭangin a zalen ta tih puangin, January 5 khan he biala sipai awm zinga 2,300 chuang chu an inpe tih an sawi. Sipai inpe zingah hian brigadier general paruk leh an chhungte pawh an tel a ni. Sipai inpete hi inremna an siam angin hmun dangah thawn nghal niin, a tam zawk chu Shan khawpui Lashio-ah thawn kir an ni.