SKorea Parliament-in ui sa ei leh zawrh khapna bill pass

South Korea Parliament chuan nimin khan an rama kum za chuang zet an lo kalpui tawh, ui sa ei leh zawrh khapna bill a pass.

South Korea hian an rin dan ṭhinah chuan nipui khaw lum laia ui sa ei hi stamina tichaktuah an ngai a, an ei nasa ṭhin hle. Mahse hun kal zelah ui sa ei hi an tlem chho zel a, a la eitu tam zawk hi chu kum upa lam an ni tawh a ni. Ui talh dante sawiselna a tam chhoh avangin, a sa ei pawh an tlem chho tawh a, khap tura nawrna pawh a awm chho ta a ni.

Ui sa ei leh zawrh khapna bill hi rorel lai party-in pu lutin, member-te thlawp a hlawh hle. Vote laknaah hian member pahnih an hai a, a bak member 208 chuan bill thlawp lamah an vote vek a ni. President Yoon Suk Yeol hi ran ngaina tak niin, a nupui First Lady Kim Keon Hee nen hian ui paruk leh zawhte pariat an vulh a, ui sa ei khap duhtu zinga mi niin, bill siamna kawngah pawh hma latu ber a ni bawk.

Ui sa khapna bill siamah hian, ui sa hmanga sumdawnnate zangnadawmna pekna tur pawh duan nghal a ni bawk. Nikum November thla khan a sa ei tura ui vulh ṭhin mi 200 vel chuan President office bulah kawng zawhin, ui sa khapna dan siam tum chu sut turin an lo phut tawh a ni. Ui vulhtu leh a sa zuartu pawl, Korean Association of Edible Dog chuan khapna siam hian talh tura ui vulhtu, farm 3,500 leh a sa zuartu, restaurant 3,500 vel a nghawng dawn niin an tarlang.