Bangladesh court-in PM hlui manna tur tichhuak

Bangladesh court chuan an ram Prime Minister hlui, Bangladesh Nationalist Party hruaitu Khaleda Zia manna tur thupek a tichhuak.

Court chuan nikuma sorkar laka lungawi lohna lantir a nih
ṭuma bus hal a nih chungchangah mipuite fuihpawrhah puhin, eptu pawl BNP hruaitu Khaleda Zia leh an party hruaitu dang 27-te manna tur hi a tichhuak a ni.

Dhaka metropolitan sessions judge Kamrul Hossain Mollah chuan nikuma eptute pawikhawihna thleng chungchang chhuitute thubuai an thehluh chu a ngaihtuah hnuah thupek hi a tichhuak a ni. Zia chuan an party mi leh sate chu Prime Minister Sheikh Hasina-i kaihhruai sorkar paihthlak a nih theihna atan kawng dang turtein a fuih nia puh a ni.

Hetihlai hian defence lawyer-te chuan PM hlui hi an puhna-ah hian politics a inrawlh nia sawiin, nikum kumtir lama an rama thla thum chhung zet nawrh huaihawt a nih ṭuma
tharum thawhna thlengah khan Zia hi a inhnamhawh lo tih an sawi.

Mahse presecutor-te chuan nawrh huaihawt a nih chhunga buaina chhuakah hian mi 150 an thi a, hei vang hian Zia leh a thawhpuite hian mawhphurhna an la tur a ni, an ti. Kum 2015, January 23-a Dhaka-a Jatrabati biala bus beih a nih ṭum khan mi pakhat thiin, midang 30 in hliam an tuar a ni.