Suu Kyi-i tan special role dilsak

Myanmar-a rorellai party, National League for Democracy (NLD) chuana an party hotu lu ber, Aung San Suu Kyi-i chanpual tur, state advisor role thar siam tura rawtna chu Parliament-ah a thehluh.

Myanma ram hi kum sawmnga dawn sipai rorelna hnuaia a awm hnuah, mipui thlan sorkar thar lakluh a ni. Mahse sipai sorkar laia an ram dan-pui siamah, ramdang mi nupui/pasal-a nei leh fa neite chu President an nih khap a ni a, hei vang hian Suu Kyi-i pawh British mi pasala a lo neih avangin President a ni thei ta lo a ni.

NLD in rawtna a thehluhah hian Suu Kyi-i chu state advisor atana dah tura an duh thu leh, he chanvo hi pek a nih chuan president leh parliament inkarah palai hna a thawk thei ang a, a ṭul anga meeting koh leh budget pawh siam turin thuneihna pek a ni bawk ang.

State advisor term hi President term nen in angin kum nga ni tura rawt a ni bawk. He rawtna hi Parliament upper house-ah thehluh a ni a, an sawiho ang. Parliament hian an rawtna siam hi an pawm ngei an rin thu NLD hotute chuan an sawi.