US leh UK sipaite'n Houthi missile leh drone kap thla

US military Central Command (CENTCOM) chuan US leh UK sipaite'n Red Sea chhim lamah January 9 khan Yemen helpawl, Houthi missile leh drone kah chhuah 21 an kap thla tih a sawi.

Houthi helpawl missile leh drone kah chhuah hian thil tihchhiat a nei lo tih sawiin, nikum November 19 aṭang khan Houthi hian Red Sea-a commercial shipping lane chu ṭum 26 an bei niin a tarlang bawk. November 19 khan Houthi hian Turkey aṭanga India pan, vehicle carrier Galaxy Leader chu an lo hijack tawh bawk.

Iran thlawp, Houthi hian Israel-in Gaza-a Hamas firfiak pawl laka beihpui a thlak dodalna atan, Red Sea-a lawngte chu an bei fo a ni. Hei vang hian shipping line ṭhenkhat chuan he kawng hi zawh duh loin, Africa lamah kawng thui zawk an zawh phah fo a ni. Houthi chuan Israel-in Gaza a beihna a tihtawp hma chuan Red Sea an beihna hi an chhunzawm zel tur thu leh, an pawl hi bitum an nih phei chuan US indo lawngte chu beihah an vau zui a ni.

Thawhlehnia Houthi-te'n Red Sea an beih lai hian commerical lane-ah hian sumdawng lawng lian 50 vel an awm. Mahse he lawng zingah hian kah chhiat an nei lo thung. Houthi-te an beih hnuah he hmunah hian indo lawng pali tirh nghal a nih thu Pentagon official chuan a sawi.

United Nations Security Council chuan nimin khan meeting koin, Houthi helte'n Red Sea area-a sumdawng lawng lian an bei ṭhin demna leh, an beihna titawp nghal tura phutna resolution siam turin vote lak a tum. Resolution-ah hian Houthi-te'n an hman, Galaxy Leader leh he lawnga thawkte chhuah tura phutna pawh tarlan tel a ni bawk. Kar hmasa lam khan US bakah ram dang 12-te chuan Houthi chu Red Sea an beih ṭhin titawp tura phutna thuchhuah an lo siam tawh a, an zawm lo a nih chuan hma an lak ve tur thu leh, engpawh thleng se Houthi chu a mawhphurtu an nih tur thute an tarlang.