Silai kengte'n Ecuador TV studio luhchilh

Ecuador-a Guayaquil khawpuia TV channel, TC studio chu Thawhlehni khan live broadcast an neih laiin silai kengte'n luhchilhin, thawktute an vau.

Police-te chuan TV station beihnaa inhnamhnawih mi 13-te chu manin, staff-te pawh chhanchhuah an ni tih an sawi. Thawktu zinga pahnih chuan hliam an tuar a ni.

Ecuador-ah hian Pathiannia gangster hlauhawm tak, Choneros gang hotu Adolfo Macias Villamar, Fito tia hriat bawk chu tan in aṭanga a tlan chhuah hnuah, Thawhṭanni aṭang khan ram pumah ni 60 chhung atan state of emergency puan a ni. Fito-a pawlte hian tualchhungah indo puang zuiin, buaina chhuakah mi 10 vel an thi tawh a, jail hrang hrangah buaina a chhuak bawk.

President Daniel Noboa chuan gang-te chu nuai chimit vek turin thupek a tichhuak a, ruihhlo leh a kaihhnawih pawikhawihna thleng ṭhinte chu a tawp thlenga do let zel an tum tih a sawi.

Ruihhlo tawlh, tualthah leh pawikhawihna dang avanga kum 34 tang tura hrem, Fito hi man leh ngei tumin ngawrh taka zawn mek a ni. Kum 44 mi, Fito hi Pathiannia police-te'n a tanna hmun, Guayaquil tan in an endik hma lawkin a tlan chhuak a ni. Official-te chuan Thawhlehni khan gang dang, Los Lobos hruiatu Fabricio Colon Pico pawh a tlan chhuak niin an sawi bawk.

Ecuador-ah hian ruihhlo leh a kaihhnawih avanga buaina leh tharum thawhna a thleng ngun hle a, nikum khan buaina chhuakah mi 7,800 chuang thiin, ruihhlo ton 220 zet man a ni. Hei bakah tan inah buaina a chhuak ngun hle bawk a, kum 2021, February thla aṭang khan tangte intihbuaina avanga nunna chan hi mi 460 chuang awm tawhin, an zinga ṭhenkhat chu hal hlum leh an lu tansakte an ni.