UN Court-in Israel laka thubuai theh luh ngaihtuah

UN International Court chuan nimin aṭang khan Israel-in Gaza Strip-a beihpui a thlak chungchangah South Africa-in thubuai a theh luh chu a ngaihtuah ṭan. South Africa hian Israel chu Gaza-a Palestinian mi tam tak tihlum leh, an thiltih dan chu Palestinian hnam leh pawlte nuai chimih vek tuma chetna niin a puh a ni. Mahse an puhna hi Israel chuan a pha thung.

UN Court-a thubuai an theh luhah, South Africa chuan Israel chuan Gaza-ah Palestinian-te an thah bakah, taksa leh rilru lam thlengin harsatna an thlensak a ni, a ti. Gaza-a Israel sipaite chetna chu titawp vek turin a phut.

The Hague, Netherlands-a UN court, International Court of Justice (ICJ) chuan Israel sipaite beihpui thlakna titawp tura South Africa-in a phutna chungchang chu a rel theih thuai rin a ni a, mahse, Palestinian mite suat nia puhnaah erawh thutlukna a siam mai a rinawm loh. ICJ rorelna hi a thu chuan ICJ-a telte hian an pawm tur tih a ni a, mahse, an nawr lui thei lo. Israel leh South Africa hi an tel ve ve a ni. Kum 2022 khan court chuan Russia chu Ukraine-a a sipaite beihpui thlakna titawp nghal turin a lo ti tawh bawk a, mahse, Russia chuan he thupek hi an ngaihthah lui tho a ni.

Israel-in air-defence system thar enchhin

Israel chuan Hamas firfiak pawl nena an indo meknaah, Hamas thlawptu pawl dangte hmun hrang hrangah an chet chhoh ve leh avangin an ram venhimna tihkhauh zualna turin air defence system thar a enchhin tih a sawi.

Air system thar an enchhin hi Spyder surface-to-air system niin, Rafael Advanced Defence System-te siam a ni. He system hi kum 20 dawn chu sipaite'n an lo hmang tawh a; drones, aircraft, cruise leh ballistic missiles-te a lo kap thla thei a ni. System an enchhin hi Spyder system thar, 'All-in-One' tih niin, ralthuam hrang hrangte chu eight-wheel drive vehicle-ah dah khawm a ni. Heng zingah hian missile launcher, radar, command and control system bakah surveillance leh target technology te a tel.