Bhutan inthlanah PM hlui Tobgay-a party an chak

Bhutan ram Parliament inthlanpui neih zawh takah prime minister hlui, Tshering Tobgay-a party, People’s Democratic Party (PDP) chuan seat la hnem berin sorkar thar an siam dawn.

Tun ṭum inthlan hi kum 2008-a lal rorelna hnuaia awm ṭhin, Parliamentary sorkara an inleh hnuah inthlan an neih ṭum lina a ni. PDA hian National Assembly seat 47 awmah seat 30 an la a, Bhutan Tendrel Party chuan seat 17 an la bawk.

Kum 58 mi, Tobgay chu a ṭum hnihna atan Bhutan prime minister a ni leh dawn ta a ni. Kum 2013-2018 chhung khan Prime Minister niin, kum 2008-a Parliament hmasa berah khan eptu hruaitu a lo ni tawh bawk. Inthlan dawna a campaign au hlaah Tobgay hian an ram economy chawikan chu a thupui ber a, hei bakah hnathawh tur awm loh avanga an ram mipui tam tak, ram danga hna zawnga chhuah ngai ṭhin chu siam ṭhat a tum thu sawiin, an ram chhungah hna thawh tur tam zawk siam chhoh a tum a ni.