Bangladesh PM atan Sheik Hasina la lut

Sheikh Hasina chu a term ngana turin Bangladesh Prime Minister atan Ningani khan rinawmna thu tiamtira lak luh a ni. Hasina hi Bangladesh Prime Minister 12-na niin, PM term a chelh ṭum ngana leh a zawna term li a chelhna a ni.

Kum 76 mi, Hasina hian an ram inthlanpui neih zawh takah, eptu pawl lian ber BNP leh a thurualpui party dangte'n inthlan an boycott-na karah, a party, Awami League chu hneh takin a tlinpui a ni. Parliament seat 300 awmah Hasina party hian seat 223 an la a ni. Jatiya Party-in seat 11 lain, Workers' Party, Jatiya Samajtantrik Dal leh Bangladesh Kalyan Party-te'n seat khat ṭheuh an la a, independent candidate-te'n seat 61 an la bawk.

Bangladesh president Mohammad Shahabuddin chuan Prime Minister thar atan Hasina hi rinawmna thu a tiamtir a, PM atana lak luh a nih hnuah a cabinet member-te lak luh an ni zui bawk. Prime Minister thar lak luh inkhawm hi an ram mi pawimawhte bakah ram dang palai eng emaw zatin an telpui.

PM Hasina kaihhruai sorkar tharah hian council of minister 36 awmin, an zinga 25 chu cabinet leh 11 chu state minister an ni. Council of minister awm thei zat hi 44 a ni.

Minister atana lak luh zingah cabinet minister 14 leh state minister pasarih chu mi thar an ni a, an zingah hian Bangladesh prime minister hmasa ber Tazuddin Ahmed fanu, Simin Hossain Rimi pawh a tel. Minister-te chanpual tur hi puan thuai a ni ang.

Hasina leh a cabinet minister-te hian nimin khan khan Savar-a National Memorial tlawhin, Liberation War-a an ram tana martar-te zahna an hlan. PM hian visitors' book-ah a hming a ziak zui bawk. Hemi hma hian Father of the Nation Bangabhandhu Sheikh Mujibur Rahman-a thlanah pangpar an dah bawk.