US leh UK-in Yemen-a Houthi hel bei

United States leh Britain sipaite chuan Yemen-a Houthi helpawlte'n Red Sea-a lawngte an beih hnuah, Yemen rama helhote lakah beihpui an thlak zui ve nghal.

US president Joe Biden chuan Houthi-te'n sumdawng lawngliante an beih hnuah a ṭul anga che lak a hreh dawn lo tih a sawi a, hemi hnu hian an sipaite hian Houthi helte hi an bei zui a ni. US leh a thurualpui ramte chuan Red Sea-a lawngliante zalen taka an kalna tibuaitute chu an en liam mai mai dawn lo tih Biden chuan a sawi zui.

Hetih lai hian Houthi chuan Yemen-a an pawl hmun beih a nih chu a nunrawnthlak hle niin an sawi ve thung a, beihpui thlaktute tan insawi fiahna tur a awm lo tiin, Israel lam pan lawngliante chu an pawl chuan an beih chhunzawm zel tur thu an sawi.

US leh UK sipaite hian Yemen-a Houthi pawl hmun pali beiin, heng zingah hian airfield pawh a tel niin Houthi pawl satellite news channel, al-Masirah chuan a tarlang.

Houthi thlawptu, Iran ram chuan US leh UK sipaite chetna chu a dem thu a sawi bawk. US chuan Houthi helte'n Red Sea an beih ṭhinnaah hian Iran pawh hi inhnamhnawihah a puh a ni. UK prime minister Rishi Sunak chuan Houthi an beih let chu an invenna atan a ngai tih a sawi bawk.