Amazon-ah hmanlai khawpui hmuchhuak

Amazon ram ngawah thingbukte'n kum sang tel an lo hliah, hmanlai khawpui hmun ni ngeia rin an hmu chhuak.

BBC-in a tarlan danin, he khawpui an hmuh chhuah hi Ecuador khawchhak lam, Upano area-ah a ni a, he hmuna in leh plaza-te chu kawngpuiin kalpawh vekin, canal-te pawh a awm ṭha hle. He hmun hi remote sensing method,e LiDAR hmanga hmuh chhuah a ni.

National Centre for Scientific Research, France-a director of investigation Prof Stephen Rostain chuan he hmun hi Amazon-a hmun dang an hmuh chhuah tawh aia upa zawk a ni tih sawiin Amazonian culture an lo ngaihdan pawh a thlak danglam tih a sawi. Mi tam tak chuan tlem te tea awmin, thawmhnaw pawh inbel mumal lo leh, sethlam in leh ram ruakahte khawsa ṭhin angah an ngai a,mahse, an khawpui hmuh chhuah aṭang hian an khawsak phung pawh a lo changkang hle niin co-author Antoine Dorison chuan a sawi.

New Scientist chuan khawpui an hmuhchhuah hi kum 1,500 - 3,000 liam ta hunlai vela mi niin a sawi. LiDAR survey hi kum 2015 aṭanga kalpui ṭan ni mah se, tun hnaiah result hi an tichhuak chauh a ni.