NKorea-in 2020 hnua a vawi khatna atan khualzin luh phal dawn

North Korea chuan Covid-19 hripui leng avanga kum 2020 kum tir lama an ramrite khar a, khualzin luh a khap hnuah a vawi khatna atan an ramah khualzin luh a phalsak leh dawn ta.

Hripui leng a reh hnuah pawh NKorea hian ramriah khuahkhirhna hi a la kalpui zel a ni. Mahse 2020 hnua a ṭum khatna atan Russia aṭangin khualzin luh hi a phalsak dawn niin Russian provincial thuneitute leh tour guide-te chuan an sawi.

Trip hi Vladivostok-based agency ruahman niin, nikum December thlaa Russia khawchhak lam, Primorsky Krai governor-in North Korea a tlawh ṭum khan a sawipui a ni. Khualzinte hi February 9-ah NKorea hi lutin, ni li an cham dawn a, an ram khawpui Pyongyang leh ski resort-te an tlawh tel dawn.

Nikum September thla khan NKorea hotu Kim Jong-un chuan Russia tlawhin, Russia president Vladimir Putin nen pawh an inhmu a ni. Ram pahnihte hian kawng hrang hrangah an inlaichinna sawhngheh an tum thute an sawi. Tun ṭumah pawh hian NKorea hian Russia khualzinte chauh luh phalna hi a la pe a, ram dang khualzinte a phalsak dawn leh dawn loh engmah a la sawi lang lo.