Taliban-in hijab hmang lo hmeichhia an vai

Afghanistan-a rorel lai, Taliban chuan Afghan hmeichhia, pawn chhuahnaa hijab hmang lote vaiin mi eng emaw zat an man.

Taliban official chuan heng hmeichhiate hian an taksa an khuh ṭha lo nia sawiin, dan an bawhchhiat thu a sawi. Security official Ehsanullah Saqib chuan hmeichhe police-te puihnain, kar liam ta chhung khan hijab inbel lo hmeichhe tam tak an man thu a sawi a ni.

Kum 2021, August thlaa thuneihna an chan hnuah, Taliban hian Afghanistan-ah Islam dan khauh tak hi an kengkawh leh a, a bikin hmeichhiate khuahkhirhna a nasa chho leh hle. Hmeichhiate chu an chhungte mipa tel loa an zin chhuah khap niin, an taksa pawh an kut hmawr leh mit tih loh chu pawn chhuahnaah khuh vek tura tih a ni. Mahse an khawpui, Kabul-ah hmeichhe tam tak chu an hmel tilanga chhuak an la awm tho a ni.

Ehsanullah chuan an hmeichhe mante chungchang hi TV-ah sawi fiahin, hijab an ha lo a, thawmhaw thawl tak hmanga an taksa khuh vek tura tih an nih laiin kekawr leh kawrfual pangngaite an ha zawk a ni,a ti. An chhungte hnenah hijab inbel loa chhuahtir tawh lo tura hriattirna atan man an ni tih a sawi bawk.