IMF-in Pakistan tan loan USD mtd 700 pek chhuah remti

International Mo­ne­­tary Fund (IMF) Executive Board chuan Pakistan economic reform programme-te a thlir let hnuah, loan USD mtd 700 pek chhuah a remti.

Pakistan Finance Ministry chuan IMF Board-in loan pek chhuah a rem tih thu hi tarlangin, hei hi SBA hnuaia sum a pek chhuah tur USD tld 1.9-na tur a ni tih a sawi bawk.

Sum leh pai lama harsatna nasa tak an tawh mek karah, Pakistan caretaker finance minister Shamshad Akhtar leh Army chief general Asim Munir-te chuan an ram economy siam ṭhat dan tur ngaihtuahin hma an la chho mek a ni. IMF programme hnuaiah Pakistan economy siam ṭhatna tura sum pek tur hi USD tld 3 niin, he programme hi kumin April chawlhkar hnihnaah a tawp dawn a ni. IMF hian nikum July thla khan a thawh khatna atan USD tld 1.2 a lo pe chhuak tawh a ni.

Pakistan official-te chuan an ram economy siam ṭhatna tura hma an laknaah, world baody thurawn anga khauh taka an kalpui thu an sawi. IMF target-te pawh an tlin thei vek tih Finance ministry chuan a tarlang.

Pakistan leiba hi an ram pawisa, PKR trillion 63.390 zet a zing tawh a, heng zingah hian domestic loan PKR trillion 40.956 leh international loan PKR trillion 22.434 a tel.