Taiwan President thar atan Lai Ching-te thlan a ni

Taiwan President thar thlannaah rorel lai, Democratic Progressive Party (DPP) candidate Lai Ching-te thlan tlin a ni.

Lai hian a campaign au hlaah pawh Taiwan democracy humhimtu tiin a inchhal a, China pawhin an ram nena an inkara boruak tichhe theituah a ngai hial a ni. A hma pawhin Lai hi sawisel foin, China aṭanga inlak hran duhtu tiin a sawi a, China defence ministry chuan Taiwan independence-na tura hma lakna reng reng do let a tum thu a lo sawi tawh bawk.

Taiwan Central Election Commission-in a tarlan danin, polling station 98%-ah vote tla te chhiar ni tawhin, Lai hian vote 40.2% a hmu. A khingpui lian ber, Opposition Kuomintang (KMT) candidate Hou Yu-ih chuan vote 33.4% hmuin, a chak loh a pawm thu a sawi tawh.

President thlannaah hian vote nei mi maktaduai 20 dawn an awm a, vote tla zat erawh puan a la ni lo. Taiwan inthlan hi China leh US chuan an ngaihven zual hle.

Lai thlan tlin a nih leh tak avangin DPP hian a term thumna atan thuneihna an chang leh dawn a, president kal chhak tur Tsai Ing-wen hian term hnih ro a rel hman a ni.