"World Court pawhin Hamas kan do mekna a titawp lo ang" : Netanyahu

Israel prime minister Benjamin Netanyahu chuan Gaza Strip-a Hamas firfiakte an do mek chungchangah, Palestinian hnam suata puha International Court of Justice-ah an lakah thubuai theh luh ni mah se, world court hian Hams an do mekna chu a tihtawp phah dawn lo tih a sawi.

Prime Minister Netanyahu chuan Inrinni zana TV-a thu a sawiah, 'Tu mahin min dang dawn lo,' tiin Hamas firfiakte an do meknaah hnehna an chan hma chu an chawl dawn lo tih a sawi a ni.

The Hague-a ICJ chuan South Africa-in Palestinian mite suata Israel a puhna thubuai ni hnih ngaihtuah a ni tawh. He thubuai chingfel tur hian kum eng emaw zat a ngaih rin a ni thung. Hemi rual hian court rorelna hi a taka kalpui erawh a harsa hle. Netanyahu pawhin Israel chuan indona titawp tura thupek awm chu a zawm dawn lo tih a sawi lawk tawh bawk.

Gaza Strip-a Israel sipaite beihpui thlaknaah hian Palestinian mi 23,000 chuang an thi tawh nia sawi a ni a, indona titawp tawh turin Israel pawhin ram hrang hrang aṭangin nawrna a tawk nasa tawh hle. Israel chuan Hamas nuai chimit loa indona tawpsan a nih mai chuan Hamas-te'n hnehna an chang tihna a ni dawn niin a sawi.

Israel internal security agency, Shin Bet hotu Ronen Bar chuan Gaza indona a tawp hunah ban a tum niin Isarel news website pakhat chuan a tarlang. Bar hian a thil tum hi a staff-te bulah a sawi tawh nia tarlan a ni a, spy agency chuan October 7-a Hamas firfiakte'n Israel bei a, mi sang chuang thihna thleng an lo dan theih loh avangin, agency hlawhchhamnaah mawhphurhna lain, ban hi a tum a ni.

Israel sipaite chuan Inrinni khan central Gaza-a Al-Muharraqa compound-a rocket kah chhuah mai tur pahnih an tihchhiat lai video an tichhuak. Sipaite chuan launcher hman theih mai tura peih sa eng emaw zat a awm bawk niin an tarlang. Israel-in Hamas a do hnuah hian Hamas thlawptu, Yemen-a Houthi helpawl leh Lebanon-a Hezbollah firfiakte chuan Israel hi an lo bei ve reng bawk a, heng pawlte hi Iran chuan a thlawp bawk a ni.

Nimin kha Israel-in Gaza-a Hamas laka beihpui a thlak ni 100-na a ni a, khawvel ram hrang hrangah Palestinian thlawptute chuan lungawi lohna lantirin, Israel chu Gaza a beihna titawp turin an phut. World Food Programme-in a tarlan danin, ni 100 zet Gaza Strip beih a nih tawh avangin mi maktaduai 2.2 vel chu ei tur kham khawp nei loin an awm tawh a, mi 10 zinga mi pakua chu darkar 24 chhung chaw ei loin an awm ṭhin a ni, a ti.

Nimin vek khan Israel sipaite chuan Gaza chhim lam, Rafah khawpuiah mipuite mamawh thiarna hun hawngin, darkar li chhung indo an chawl lailawk.