Beirut-a chhiatna thlengin a nghawng chhui zel Mi 70,000 chuangin hna thawk chhunzawm thei lo

Lebanon khawpui, Beirut-a August 4 zana lawng chawlhna  hmuna thil puak na takin chhiatna a thlente chu chhut chian mek a ni a, he chhiatna thleng vang hian tun thlengin mi 70,000 chuang chu hna thawk chhunzawm thei loin an awm mek tih United Nations thupuangtu Stephane Dujarric chuan a sawi. 

UN leh a thawhpui dangten Beirut-a chhiatna thlengin nghawng hrang hrang a neihte an zir chiannaah, Lebanon ram sum dinhmun tlakhniam avangin mi 2,20,000 chuan hna an chan tawh tih an sawi. Hei bakah hian August 4 zana chhiatna thleng vang hian mi 70,000 vel chu hna thawk thei loin an awm belh leh bawk. Covid-19 leng vanga hna chante an la chhut tel lo. 

Dujaricc chuan Beirut-a chhiatna rapthlak tak thlengah khan doctor 2,000 vel chu hliam tuar leh, an clinic te a chhiat thu a sawi. Thil puakin khawpui chhunga building a tihchhiat hi 40,000 vel a ni a, heng zingah hian chenna in 3,000 a tel bawk. 

UN Refugee Agency (UNHCR)  chuan khawpui chhunga cheng zinga harsatna tawk mekte chhawmdawlna tur hian US dollar maktaduai 35 a  buatsaih mek a ni. Agency chuan khawpuia chhawmdawlna an dahkhawmna hmun chu thil puak hian a tichhe ve lo a, an thil chhekkhawmte hi Lebanese Red Cross leh an thawhpui dang hnena hman tura pein, chhiatna tuarte hnenah shelter kit, blanket, plastic sheet, mattress leh an mamawh dangte sem an ni. 

Khawpui chhunga chhiatna thleng vangin a nghawng, nimin thleng insurance claim hi US dollar  maktaduai 425 a tling tawh. Lebanon president Michel Aoun, minister of economy Raoul Nehme leh insurance sector aiawhten meeting an neihah, insurance claim-na tur lehkha thehluh hi 2,500 a awm tawh tih an sawi a, minister chuan application lut hi a 10,000 vel a tlin chhoh a rin thu a sawi. 

Lawng chawlhna hmuna thil puakin khawpui chhunga thil a tihchhiat  hi US dollar tluklehdingwn 10-15 hu vel nia chhuat a ni. He chhiatna thleng vanga thi hi mi 171 an ni tawh a, chin hriat lohin mi eng emaw zat an la awm.