US Navy-te'n Houthi missile kap

US Navy-te chuan Houthi helpawlin Yemen aṭanga Red Sea chhim lama US destroyer beihna tura anti-ship cruise missile an kah chhuah chu an lo kap thla tih an sawi.

Pathianni khan US fighter aircraft chuan Houthi missile kah chhuah hi Yemen-a lawngchawlhna hmun, Hodeidah khaw bul hnaiah a lo kap thla a ni. Hetih lai hian Houthi chuan US aircraft chu Yemen airspace leh tuipui area bul maiah a rawn thlawk nia sawiin, an ram thuneihna palzutsakna niin an puh ve thung.

Houthi-te'n Red Sea-a bungraw phur lawng liante an beih hnuah US leh UK chuan Houthi lakah hian beihpui an thlak zui ve a, Yemen-a Houthi hmun 30 dawn an bei. Heng zingah hian ralthuam an dahna hmun te leh air defence system-te a tel. Inrinni khan US chuan Houthi radar site a kap leh bawk. Houthi pawl hian nikum November 19 aṭang khan Red Sea-ah lawng liante chu ṭum 27 zet an kap tawh a, heng an lawng beihte hi Israel lam pan leh, Israel lawng te an nih thu an sawi. Hetih lai hian an lawng beih zinga ṭhenkhat chu Israel nena inzawmna nei lote an ni thung. Helpawlte chetna avang hian shipping company lian eng emaw zat chuan Red Sea-ah an lawngte kaltir loin, Africa chhim lam helin kawng thui zawk lam an zawhtir a ni.

US president Joe Biden chuan an mite venhimna tur leh, international commerce zalen taka a kal theihna turin a ṭul anga chet a hreh dawn lo tih sawiin Houthi hi a lo vau tawh a, UK pawhin Houthi lakah beihpui thlak chhunzawm turin an inpeih reng tih a sawi bawk. Hetih lai hian Houthi thlawptu lam chuan Yemen-a US leh UK sipaite'n beihpui an thlak chhunzawm zel chuan helho hian Red Sea-a US leh UK indo lawngte chu an bitum mai dawn nia a lan thu an sawi ve thung. Houthi hian Israel hmelma hlun, Iran aṭangin ralthuam an dawngṭhin nia hriat sawi a ni.