NKorea-in ballistic missile en chhin leh

North Korea chuan an ram khawchhak lam tuipuiah ballistic missile a kap chhuak leh niin South Korea chuan a sawi.

South Korea Joint Chiefs of Staff chuan ballistic missile hi Pathianni khan an kap chhuak tih sawiin, missile hi Korean Peninsula leh Japan inkar tuipuia a tlak hmain km 1,000 vel a thlawk hman niin a sawi. Hemi hma ni hian NKorea hian artillery shell eng emaw zat chu SKorea ramri bulah a lo kap chhuak tawh bawk.

North Korea official Korean Central News Agency chuan January 14-a missile an enchhin chu a hlawhtling hle tih a sawi a, test an neihnaah hian an ram hotu lu ber King Jong-un a tel leh tel loh erawh an tarlang lo.

Kum 2021 aṭang khan NKorea hian hypersonic weapon a lo enchhin fo tawh a, hengte hi Mach 5 aia thlawk chak zawk, ri chak lam let nga vela chak nia sawi an ni. Nikum khan a ṭum khatna atan solid-fuel intercontinental ballistic missile a lo enchhin tawh bawk a, US ram laili kap pha thei tur ralthuam a neih zingah a tel.