Myanmar helpawlin India leh Bangladesh ramri bul khua an la

Myanmar-a Arakan Army (AA) chuan Pathianni zan khan India leh Bangladesh ramri bul, Rakhine state-a Paletwa khua chu sipaite kut aṭangin an la tih an sawi.

AA chuan an ṭhenawm ramte nena an insumdawn tawnna kawnga hmun pawimawh, Kaladan River port town, Paletwa khua chu an thununna hnuaiah a awm tih sawiin, an pawl thupuangtu Khine Thu Kha chuan ramri boruak ṭha a awm theihna turin an ṭhenawm ramte nen pawh thawhhona ṭha tak siam an tum tih a sawi.

Hemi hma hian helpawl pathum intel khawm, 'Three Brotherhood Alliance' chuan China ramri bula khaw pawimawh tak, Laukkai chu sipaite kut aṭangin an lo laksak tawh bawk. He pawlah hian Myanmar National Democratic Alliance Army (MNDAA), Ta'ang National Liberation Army leh Arakan Army-te an tel a ni.

Myanmar sipaite'n February, 2021-a civil sorkar thuneihna an hnehchhuh hnuah ram chhunga sipai sorkar dodalna nasa taka lantir chhunzawm zel a ni a, nikum October thla aṭang khan helpawl hrang hrangte chuan sipaite lakah beihpui an thlak a ni. Helpawlte hi democracy tundin duhtu lamin an thlawp avangin hma an sawn chho zel a, sipaite kut aṭangin khaw eng emaw zat an laksak tawh bawk.

Pathianni khan Myanmar sipai sorkar chuan China ramri lam bialah Ta'ang National Liberation Army (TNLA) chu inkahhai puang turin inremna a siampui. He inremna hi China hmalakna hnuaiah siam a ni. Mahse helpawl chuan an inremna siam hi sipai lam hian bawhchhiain, Shan state-a khaw eng emaw zat chu an bei chhunzawm leh niin an puh.